Tómstunda- og félagsmálafræðingurinn minn!

Arnar Snæberg Jónsson komst inn í Kennaraháskóla Íslands og mun því útskrifast vorið 2009 eftir 90 eininga nám með B.A. gráðu sem tómstunda- og félagsmálafræðingur!

Markmið með námi í tómstunda- og félagsmálafræði við Kennaraháskóla Íslands er að veita þekkingu og hæfni sem nauðsynleg er fyrir ólík verkefni á sviði tómstunda- og félagsstarfa. Í náminu eiga nemendur að tileinka sér þekkingu á gildi, þýðingu og hlutverki tómstunda í nútímasamfélagi. Markmiðið er að þeir fái heildarsýn á þá starfsemi sem fer fram í tómstundum barna og ungmenna og það menningar- og uppeldishlutverk sem tómstundastarf gegnir í lífi þeirra. Einnig verður vikið að öðrum aldurshópum.

Má því segja að á tómstundabraut fræðist nemendur um tómstundir frá vöggu til grafar en þó með áherslu á börn og ungmenni. Í náminu kynnast nemendur ýmsum kenningum og aðferðum við leiðsögn og uppeldi. Einnig fá þeir tækifæri til að skoða sjálfa sig, bakgrunn sinn og viðhorf til uppeldis og á þeim grundvelli móta viðhorf sín til barna, ungmenna og annarra sem þeir kunna að starfa með. Lögð er áhersla á að nemendur verði færir um að stjórna, skipuleggja, framkvæma og meta tómstundastarf. Einnig að nemendur öðlist færni í samskiptum og samvinnu við þá sem þeir þurfa að eiga samstarf við, s.s. í skóla-, félags-, heilbrigðis- og menningarmálum. Stefnt er að því að nemendur rækti með sér gagnrýnið hugarfar og verði við námslok sjálfstætt hugsandi og ábyrgir.

Námið er einkum ætlað þeim sem hafa áhuga á að starfa á vettvangi frítímans, svo og því starfsfólki sem þegar vinnur að tómstundamálum í grunnskólum, framhaldsskólum, félagsmiðstöðvum, íþrótta- og æskulýðsfélögum og á öðrum vettvangi tómstunda og frítíma.
Nám í tómstunda- og félagsmálafræði, 90 einingar til B.A.-gráðu er fjögurra ára fjarnám og skiptist í menntunarfræði, tómstundafræði, valnámskeið og vettvangstengd verkefni. Við mótun námskeiða er jöfnum höndum lögð áhersla á sterka fræðilega undirstöðu og hagnýt viðfangsefni í starfi.

Nú er nýlokið afgreiðslu umsókna á grunnskólabraut (stað- og fjarnám), Íþróttabraut (staðnám), leikskólabaut (stað og fjarnám), tómstundabraut (fjarnám) og þroskaþjálfabraut (stað- og fjarnám). Umsóknir um nám á þessum brautum voru 935. Þar af voru 559 umsækjendur með stúdentspróf, eða 60%. 143 karlar sóttu um nám á þessum brautum og voru þeir 15% umsækjenda. Meðalaldur umsækjenda var 29,6 ár.388 umsækjendur fá skólavist næsta vetur, þar af voru 333 með stúdentspróf eða 86%. Allir þeir sem ekki hafa lokið stúdentsprófi en fengu skólavist í grunndeild næsta vetur hafa lokið framhaldsskólanámi sem er jafnlangt námi til stúdentsprófs eða stundað háskólanám. 64 körlum var boðin skólavist og eru þeir 19% þeirra sem fá inngöngu á fyrrnefndar námsbrautir. Meðalaldur nýnema er 27,8 ár.

Þess má geta að Addi er einn af 27 nemendum sem komust inn á Tómstunda- og félagsmálabraut en 61 manns sóttu um. Þvílíkur snillingur, húrra, bravó - JIBBÍ!!!!!!