Hamingjudagar á Hólmavík

Jæja þá erum við komin heim af bæjarhátíðinni Hamingjudagar á Hólmavík. Við fórum héðan á fimmtudagskvöld og dvöldum í góðu yfirlæti hjá Ásdísi tengdó í þrjár nætur. Það var æðislega gaman að renna inn í bæinn og sjá að bæjarbúar hafa tekið höndum saman og skreytt, lagfært, málað og ýmislegt fleira til þess að klæða bæinn í sannkallaðan hátíðarbúning.

Bænum var skipt niður í svæði og hvert svæði hafði sinn lit. T.d. var Víkurtúnið þar sem íbúðin okkar er í ,,rauða hverfinu” en Höfðagatan, heimili Ásdísar, var í ,,bláa hverfinu”. Í lundinum fyrir neðan kirkjuna var búið að útbúa svið þar sem flest skemmtiatriðin fóru fram. Þar má nefna Hemúlinn, sönghópinn Létt og laggott, Idolstjörnuna Heiðu Ólafs, töframann, Kvennakórinn Norðurljós og margt fleira skemmtilegt. Þrátt fyrir mikla rigningu var helgin virkilega vel heppnuð og skemmtu strákarnir sér vel, sérstaklega þá í hoppikastalanum, kóngulóarvefnum og leiktækjunum. Ég byrjaði laugardaginn á því að fara á heilsumorgun í Íþróttamiðstöðinni þar sem ég fékk að smakka ýmsan heilsuvarning og boðið var upp á nudd og heilun. Síðan kíkti ég upp í skóla á myndlitsa- og ljósmyndasýningu þar sem sannir listamenn af Ströndum sýndu verk sín. Dagskráin á sviðinu byrjaði síðan um tvö og stóð til rúmlega sjö.

Á laugardagskvöldið fórum við síðan út að borða á Café Riis, tókum þátt í blysför frá Galdrasýningunni inn á Kópnes þar sem kveiktur var varðeldur og fjöldasöngur við undileik Ásdísar. Um nóttina skelltum við hjú okkur síðan á Café Riis þar sem Stebbi Jóns ásamt Halldóri félaga sínum héldu uppi stuði og síðar í Braggann þar sem hljómsveitin Kokteill spilaði fyrir fullu húsi með Bjarna Ómar í broddi fylkingar. Við vorum ekki komin heim fyrr en um fimmleytið og lögðum því ekki af stað fyrr en tólf tímum síðar til Reykjavíkur.

Hátíðin var í alla staði afar vel heppnuð og mega þeir sem komu að henni á einhvern hátt mikið hrós skilið. Sérstaklega vil ég þá nefna Bjarna og menningarmálanefndina sem stóðu sig með eindæmum vel eins og þeirra er reyndar von og vísa.

Í dag höfum við strákarnir aðallega verið að ganga frá öllu eftir helgina, taka til og þrífa á meðan Addi var að vinna. Síðan skelltum við okkur öll, ásamt henni Söru vinkonu hans Tómasar, í sund í Laugardalslaugina í kvöld. Á morgun erum við að hugsa um að bruna eitthvað út úr bænum og elta góða veðrið með tjald og svefpoka í bílnum... það kemur bara í ljós :)